तिन दशकभन्दा बढी समय
तपाईहरूसँगै छु ।

आदरणीय बागलुङबासी बुबाआमा, दाजुभाइ तथा दिदीबहिनीहरू,

हार्दिक नमस्कार, अभिवादन ।

नवयुवा पुस्ताको ऐतिहासिक आन्दोलनपछि देश नितान्त नयाँ र फरक राजनीतिक परिवेशमा प्रवेश गरेको छ। यही परिवेशमा आउँदो फागुन २१ गते सम्पन्न हुन गइरहेको प्रतिनिधिसभा निर्वाचनको सन्दर्भमा, म बागलुङ जिल्ला निर्वाचन क्षेत्र नं. १ बाट सूर्य ध्वजाबाहक उम्मेदवारको रूपमा तपाईंहरूको अमूल्य मत माग्न विनम्रतापूर्वक उपस्थित भएको छु।

सर्वप्रथम, देशमा सकारात्मक परिवर्तनको आकांक्षा बोकेर शान्तिपूर्ण आन्दोलनको नेतृत्व गर्ने नवयुवा पुस्ताप्रति हार्दिक सम्मान र आभार प्रकट गर्न चाहन्छु। साथै, उक्त आन्दोलनको क्रममा जीवन गुमाएका सम्पूर्ण युवाहरूप्रति भावपूर्ण श्रद्धाञ्जली अर्पण गर्दछु ।

समाज, राजनीति र नागरिक चेतना निरन्तर परिवर्तनशील छन् । हाम्रा सोच, कार्यशैली र व्यवहारहरु भन्दा नागरिकका आकांक्षा, देशका आवश्यकता र विश्व परिवेशको गति धेरै रफ्‌तारमा छ। विज्ञान, प्रविधि, विश्वव्यापी पहुँच र चेतनाको विस्तारसँगै हामीले पनि आफूलाई सुधार्नु, परिमार्जन गर्नु र समयअनुकूल बनाउनु आजको बाध्यता होइन, अनिवार्यता हो । यदि हामी परिवर्तन स्वीकार्न चाहँदैनौँ भने समयले हामीलाई कुर्दैन । यही यथार्थलाई आत्मसात गर्दै म निम्न प्रतिबद्धता व्यक्त गर्न चाहन्छु।

नेपाल कम्युनिस्ट पार्टी एमाले लामो, संघर्षपूर्ण र गौरवशाली इतिहास बोकेको पार्टी हो। जनताको हक-अधिकार, जीवनस्तरको उन्नयन, राष्ट्रिय स्वाभिमान र सार्वभौमिकताको पक्षमा उभिएको इतिहास सबैका सामु स्पष्ट छ । जसरी जीवनमा घुम्तीहरू आउँछन्, राजनीतिमा पनि घुम्तीहरू आउँछन्। काम गर्ने क्रममा कमजोरीहरू हुन सक्छन् । तर, कमजोरीबाट भाग्ने होइन, सुधार्ने, सिक्ने र अगाडि बढ्‌ने उत्तम विकल्प हो।

वृद्ध भत्ता, "आफ्नो गाउँ आफै बनाऔं अभियान, भूकम्पपछिको पुनर्निर्माणमा आत्मविश्वास जगाउने भूमिका, नाकाबन्दीको बेला राष्ट्रिय स्वाभिमानको रक्षा, राष्ट्रिय गौरवका आयोजनाहरूको सुरुवात र कार्यान्वयन, यी सबै उपलब्धिहरू बोकेको पार्टीलाई केही कमजोरीका आधारमा सम्पूर्ण रूपमा अस्वीकार गर्नु भनेको समाजलाई पुनः अर्को अतिवादतर्फ धकेल्नु हो । आजको आवश्यकता घृणा होइन, मुद्दामा आधारित राजनीति, स्वस्थ बहस, विचारको प्रतिस्पर्धा लोकतान्त्रिक अभ्यास हो।